News Point PK

کراچی میں پانی کا بدترین بحران جاری مختلف علاقوں میں گزشتہ 6 دن سے پانی کی فراہمی مکمل طور پر بند ہے اور خدشہ ہے کہ مزید 3 سے 4 دن شہر میں پانی کی فراہمی متاثر رہے گی۔

میڈیا رپورٹ کے مطابق کراچی میں بجلی کے بریک ڈاون کے باعث متاثر ہونے والی پانی لائنوں کا مرمتی کام تاحال مکمل نہیں ہوسکا، جس کے نتیجے میں شہر کو کروڑوں گیلن پانی فراہم نہیں کیا جا سکا اور مختلف علاقوں میں مکین پانی کی بوند بوند کو ترس گئے ہیں۔

متعلقہ حکام کی جانب سے لائنوں کے مرمتی کام میں تاخیر کے باعث کراچی میں پانی کا بحران بدترین شکل اختیار کرتا جا رہا ہے جہاں 27 اپریل کو دھابیجی پمپنگ اسٹیشن پر بجلی کے بریک ڈاون کی وجہ سے پانی تین لائنیں پھٹ گئی تھی۔

بعد ازاں لائن نمبر 5 کا مرمتی کام مکمل کرلیا گیا لیکن تاحال 6 دن گزرنے کے باوجود لائن نمبر ایک اور لائن نمبر دو کا مرمتی کام مکمل نہیں ہوسکا، جس کی وجہ سے مختلف علاقوں میں پانی کی فراہمی بند ہے، متاثرہ علاقوں میں کورنگی، لانڈھی، گلستان جوہر، گلشن اقبال، لیاقت آباد، پی آئی بی کالونی، ناظم آباد، ملیر، شاہ فیصل کالونی، چنیسر گوٹھ سمیت دیگر علاقے شامل ہیں۔

رپورٹ کے مطابق دھابیجی پمپنگ اسٹیشن پر لائنوں کے مرمتی کام کی وجہ سے 7 پمپس سے شہر کو پانی فراہم نہیں کیا جا رہا ہے جس کے باعث شہر میں پانی کا بحران پیدا ہو گیا۔