پشاور: گورنر خیبرپختونخوا فیصل کریم کنڈی نے وزیراعلیٰ سہیل آفریدی کو مستعفی ہونے کا مشورہ دیتے ہوئے کہا ہے کہ دہشتگردی کے خلاف جنگ پر کوئی سمجھوتہ نہیں ہوگا اور صوبے کو دہشتگردوں کے حوالے نہیں کیا جا سکتا۔
انہوں نے خبردار کیا کہ 9 مئی جیسے اقدامات کی کوشش کی گئی تو اس کے نتائج بھگتنا ہوں گے۔
میڈیا رپورٹ کے مطابق فیصل کریم کنڈی نے پی ٹی آئی کے لانگ مارچ پر تنقید کرتے ہوئے اسے ’’لکی ایرانی سرکس‘‘ قرار دیا اور دعویٰ کیا کہ مارچ کے شرکا صوابی آنے سے گریز کر رہے ہیں۔ ان کا کہنا تھا کہ صوبائی حکومت وفاق سے محاذ آرائی کے بجائے عوام کے جان و مال کے تحفظ پر توجہ دے۔
گورنر نے کہا کہ خیبرپختونخوا میں دہشتگردی کے خلاف مؤثر اقدامات ناگزیر ہیں اور تمام سیاسی جماعتوں کو اس معاملے پر متحد ہونا چاہیے۔
انہوں نے واضح کیا کہ گورنر راج کے نفاذ کا فیصلہ وفاقی حکومت کرے گی، جبکہ آئینی معاملات آئین کے مطابق طے کیے جائیں گے۔
