کراچی: امیر جماعت اسلامی حافظ نعیم الرحمان نے کہا ہے کہ اگر دفاعی معاہدہ مسلمانوں کے تحفظ کے لیے ہے تو اس میں ایران، فلسطین اور دیگر اسلامی ممالک کو بھی شامل کیا جائے۔
میڈیا رپورٹ کے مطابق کراچی میں کارکنان سے گفتگو کرتے ہوئے حافظ نعیم الرحمان نے کہا کہ فلسطین اور مسجد اقصیٰ کی آزادی کے لیے امت مسلمہ کو اپنی جدوجہد تیز کرنا ہوگی۔
ان کا کہنا تھا کہ جنگ بندی کے باوجود غزہ میں اسرائیلی کارروائیاں جاری رہنے کی اطلاعات ہیں۔
امیر جماعت اسلامی نے کہا کہ مظلوم فلسطینیوں کے ساتھ کھڑا ہونا ضروری ہے اور ظلم کی ہر شکل کے خلاف آواز بلند کی جانی چاہیے۔
انہوں نے دعویٰ کیا کہ جماعت اسلامی اور الخدمت فاؤنڈیشن فلسطینیوں کے لیے 10 ارب روپے سے زائد کی امداد بھجوا چکے ہیں۔
حافظ نعیم الرحمان نے کہا کہ جماعت اسلامی پٹرولیم لیوی کے خلاف بھی جدوجہد جاری رکھے ہوئے ہے، تاہم فلسطینی عوام کی حمایت سے پیچھے نہیں ہٹی۔
