لاہور: وزیر اطلاعات پنجاب عظمیٰ بخاری نے سہیل آفریدی کے لانگ مارچ پر تنقید کرتے ہوئے کہا ہے کہ یہ مارچ اب ’’شارٹ ٹرم مارچ‘‘ میں تبدیل ہوچکا ہے اور ان کے بقول اس کا فائدہ دہشت گرد تنظیموں کو پہنچ رہا ہے۔
میڈیا رپورٹ کے مطابق اپنے بیان میں عظمیٰ بخاری نے کہا کہ خیبرپختونخوا دہشت گردی سے شدید متاثر ہے، جہاں سکیورٹی فورسز عوام کے تحفظ کے لیے قربانیاں دے رہی ہیں، جبکہ دوسری جانب سہیل آفریدی کنٹینر پر چڑھ کر مارچ کر رہے ہیں۔ انہوں نے سوال اٹھایا کہ صوبے میں عوام خود کو غیر محفوظ محسوس کر رہے ہیں، لیکن مارچ کے شرکا بظاہر محفوظ ہیں۔
عظمیٰ بخاری نے پی ٹی آئی قیادت کو بھی تنقید کا نشانہ بناتے ہوئے کہا کہ پارٹی کی سینئر قیادت ایک مخصوص طرزِ سیاست کے باعث مشکلات کا شکار ہے۔ ان کا کہنا تھا کہ خیبرپختونخوا کے عوام اور پولیس کی دہشت گردی کے خلاف قربانیاں ناقابلِ فراموش ہیں۔
انہوں نے مزید دعویٰ کیا کہ عوام کی جانب سے مسترد کیے جانے کے بعد مصنوعی ذہانت سے تیار کردہ ویڈیوز سوشل میڈیا پر شیئر کی جا رہی ہیں۔
