غزہ: اسرائیلی وزیراعظم بنیامین نیتن یاہو نے غزہ میں فوجی پوزیشنز کا دورہ کرتے ہوئے واضح کیا ہے کہ جنگ بندی کے باوجود اسرائیلی فوج اپنی موجودہ پوزیشن سے پیچھے نہیں ہٹے گی۔
میڈیا رپورٹس کے مطابق نیتن یاہو کے دورے کے موقع پر اسرائیلی فوج کے چیف آف اسٹاف ایال زامیر، سدرن کمانڈ کے سربراہ میجر جنرل یانیو عشور اور ڈویژن 99 کے کمانڈر بریگیڈیئر جنرل ایلیڈ تزوری بھی موجود تھے۔
اسرائیلی وزیراعظم نے ’’یلو لائن‘‘ کے قریب گفتگو کرتے ہوئے دعویٰ کیا کہ اسرائیلی فوج اس وقت غزہ کی تقریباً 60 فیصد پٹی پر کنٹرول رکھتی ہے۔
نیتن یاہو نے کہا کہ اسرائیل اپنی موجودہ لائن سے پیچھے نہیں ہٹے گا اور غزہ میں اپنی گرفت برقرار رکھے گا۔
انہوں نے حماس کا نام لیے بغیر کہا کہ اسرائیلی فوج ان جنگجوؤں کے خلاف کارروائیاں جاری رکھے گی جو اسرائیل کے لیے خطرہ بن رہے ہیں۔ ان کا کہنا تھا کہ غزہ میں اسرائیل کی گرفت مزید مضبوط ہوگی اور جنگجوؤں کے خلاف کارروائیاں جاری رہیں گی۔
نیتن یاہو نے یہ بیان ایسے وقت میں دیا ہے جب غزہ میں جنگ بندی کے باوجود اسرائیلی فوج کی موجودگی اور مستقبل کی فوجی حکمت عملی پر سوالات اٹھائے جارہے ہیں۔
