بھارتی غرور خاک آلود اور جھوٹا بیانیہ دفن، معرکہ حق میں دشمن کو ہر محاذ پر شکست دی، ڈی جی آئی ایس پی آر

ویب ڈیسک

07-May-2026

تازہ ترین

معرکہ حق کے ایک سال مکمل ہونے پر ڈی جی آئی ایس پی آر لیفٹیننٹ جنرل احمد شریف نے اہم پریس کانفرنس کرتے ہوئے کہا ہے کہ پاکستان نے اپنے سے پانچ گنا بڑے دشمن کو شکست دی۔

پاک بحریہ اور پاک فضائیہ کے سینیئر افسران کے ہمراہ پریس کانفرنس کرتے ہوئے ڈی جی آئی ایس پی آر نے کہا کہ معرکہ حق کا ایک سال مکمل ہونے پر قوم کو مبارکباد دیتے ہیں، معرکہ حق میں پاکستان نے بھارت کو ہر محاذ پر عبرتناک شکست دی۔

لیفٹیننٹ جنرل احمد شریف نے کہا کہ ہم نے ایک سال پہلے بھارت کا غرور خاک میں ملادیا، ہم ہمیشہ کہتے تھے کہ کسی کا باپ بھی پاکستان پر آنچ نہیں لا سکتا۔ ہم تب بھی تیار تھے اور اب بھی تیار ہیں، کسی کو شک ہے تو اس کی ایک قسط ہم نے دکھائی ہے

ڈی جی آئی ایس پی آر نے کہا کہ بھارت کو ہر محاذ پر شکست دی اور معرکہ حق میں ہم نے جنگ کی جہت کو بدل دیا، پاکستان نے ملٹی ڈومین وار میں دشمن کو جنگ میں شکست دی جو فضا، زمین، سمندر اور سائبر میں تھی۔

انہوں نے کہا کہ بھارت دہائیوں سے جھوٹا بیانیہ بنا رہا تھا کہ پاکستان دہشت گردی میں ملوث ہے اور بھارت نے بیانیے کے لیے فالس فلیگ آپریشن کیے اور پہلگام واقعے پر بغیر تحقیقات لمحوں میں پاکستان پر الزام لگا دیا گیا۔

لیفٹیننٹ جنرل احمد شریف نے کہا کہ بھارت کا دہشت گردی کا ڈرامہ ہمیشہ کے لیے دفن ہوگیا، بھارت خود سب سے بڑا دہشت گرد ہے، بھارت بتائے کس دہشت گرد کیمپ کو نشانہ بنایا؟ بھارت اپنے لوگوں سے دہشت گردی کرواتا ہے اور الزام دوسروں پر ڈال دیتا ہے۔

انہوں نے کہا کہ بھارت دہشت گردوں کی سہولت کاری کر رہا ہے، پاکستان میں دہشت گردی کے ہر واقعے کے پیچھے بھارت اور افغانستان ملوث ہیں۔ افغان طالبان کے نام نہاد وزیر خارجہ بھارت سے مدد مانگتے ہیں۔

لیفٹیننٹ جنرل احمد شریف نے کہا کہ بھارت پہلگام واقعے کے حوالے سے آج تک ثبوت سامنے نہیں لا سکا، پہلگام واقعے کے 10 منٹ بعد ایف آئی آر درج ہوگئی پہلگام واقعے کو ایک سال گزر گیا، ثبوت کہاں ہیں؟

انہوں نے کہا کہ معرکہ حق میں جو کچھ ہوا پاکستان ہی نہیں بلکہ ہندوستان کا بچہ بچہ بھی جانتا ہے، بھارت کو نصیحت ہے کہ سچ بولنا سیکھے۔ بھارت میں اقلیتوں پر ہندوتوا ذہنیت مسلط کی جا رہی ہے-

لیفٹیننٹ جنرل احمد شریف چوہدری نے کہا کہ بھارت کے سیاست دان، سیاست دان کم ار جنگجو زیادہ لگتے ہیں۔ بھارت کی پروفیشنل فوج کو سیاست کی بھینٹ چڑھا دیا گیا۔ بھارتی سیاست دان ہندوتوا کے نعرے اور اکھنڈ بھارت کی باتیں کر رہے ہیں، اگر یہی زبان استعمال کرنا ہے سامنے آ جاؤ پھر۔

انہوں نے واضح کیا کہ بھارتی پراکسیز کا پہلے بھی منہ توڑ جواب دیا اب بھی انہیں کہیں کا نہیں چھوڑیں گے، شکست کا غصہ ہے اسی لیے کبھی فتنۃ الخوارج تو کبھی فتنۃ الہندوستان کا استعمال کرتے ہیں۔ پاکستان میں دہشت گردی کے ہر واقعے کے پیچھے بھارت اور افغانستان ملوث ہیں۔

لیفٹیننٹ جنرل احمد شریف چوہدری نے کہا کہ خطے کو استحکام کون دے رہا ہے، پاکستان ہی دے رہا ہے اور خطے میں امن کے لیے سب سے زیادہ کوششیں پاکستان کر رہا ہے۔ ہمارے عزم پر کسی کو شک نہیں ہونا چاہیے، دو نیوکلیئر ریاستوں کے درمیان جنگ پاگل پن ہے-

انہوں نے کہا کہ 14 اگست کو پاور پوٹینشل کی چھوٹی سی جھلک عوام کو دکھائیں گے، مقصد یہ ہے کہ وہ بعد میں یہ نہ کہیں کہ بتایا نہیں تھا۔ پاکستان کی سلامتی اور خود مختاری کا ہر قیمت پر دفاع کریں گے۔

لیفٹیننٹ جنرل احمد شریف نے کہا کہ اللہ کا شکر ادا کرتے ہیں جب ہم اس سال کا احاطہ کرتے ہیں، ہم احاطہ کریں گے کہ ہمارا مشرقی ہمسایہ ملک سارا سال کیا کرتا رہا۔ یہ سندور سے نکلتے کیوں نہیں، سندور تو خواتین کو لگایا جاتا ہے۔

انہوں نے کہا کہ کشمیر بھارت کا اندرونی معاملہ نہیں، کشمیر عالمی سطح پر تسلیم شدہ حل طلب معاملہ ہے، کشمیر پر اقوام متحدہ کی قراردادیں موجود ہیں، بھارت کشمیری مسلمانوں اور منی پور کے شہریوں پر مظالم ڈھا رہا ہے۔

ڈی جی آئی ایس پی آر لیفٹیننٹ جنرل احمد شریف کا کہنا تھا کہ ایک پاکستان اور دوسرا فیلڈ مارشل دن رات بھارت کے خواب میں آتے ہیں۔

پریس کانفرنس سے گفتگو کرتے ہوئے ڈپٹی چیف آف نیول اسٹاف آپریشنز کا کہنا تھا کہ بھارت نے بحری بیڑا تعینات کرنے کی کوشش کی، بھارت کو اپنی بحری طاقت پر بہت ناز تھا، بھارتی بحریہ ہر طرح سے لیس تھی لیکن جارحیت کی ہمت نہ کر سکی۔

انہوں نے کہا کہ معرکہ حق میں پاک بحریہ اور پاک فضایہ مل کر دشمن کو تباہ کرنے کے لیے تیار تھے، اس دوران ہماری بندرگاہیں، تنصیبات محفوظ اور فعال رہیں۔

ڈپٹی چیف آف نیول اسٹاف نے کہا کہ ہم امن کے خواہاں ہیں مگر اسے کمزوری نہ سمجھا جائے، معرکہ حق میں ہماری ہم آہنگی بے مثال فتح کے سبب بنی، ہمارے بحری اثاثے سمندر میں محفوظ ہیں۔