امریکی صدر ڈونلڈ ٹرمپ نے ایران کی موجودہ صورتحال کو شدید معاشی بحران قرار دیتے ہوئے دعویٰ کیا ہے کہ ایرانی حکومت فوج کے بڑے حصے کی تنخواہیں ادا کرنے سے بھی قاصر ہے۔
میڈیا رپورٹ کے مطابق واشنگٹن سے جاری بیان میں ڈونلڈ ٹرمپ نے ایرانی حکومت پر احتجاج کرنے والوں کے خلاف کارروائی کا الزام عائد کرتے ہوئے کہا کہ ایران میں جاری بحران کو فوری طور پر روکنے کی ضرورت ہے۔ ان کے بیان کے مطابق تہران بیک وقت معاشی دباؤ اور اندرونی بے چینی کا سامنا کر رہا ہے۔
ٹرمپ کا یہ بیان ایسے وقت سامنے آیا ہے جب واشنگٹن نے ایران پر اقتصادی دباؤ مزید بڑھا دیا ہے اور نئی پابندیوں کے ذریعے ایرانی معیشت، تجارت اور مالیاتی نظام کو نشانہ بنانے کی کوشش کی جارہی ہے۔
ایرانی معیشت پر بڑھتے دباؤ کے باعث کرنسی کی قدر میں شدید کمی اور مہنگائی میں اضافے کی رپورٹس بھی سامنے آئی ہیں، جبکہ تہران امریکی پابندیوں کو مسترد کرتے ہوئے ان کا مقابلہ کرنے کے عزم کا اظہار کر رہا ہے۔
