چیف آف ڈیفنس فورسز فیلڈ مارشل سید عاصم منیر کا دورۂ ایران مکمل ہوگیا، جہاں انہوں نے ایرانی صدر، پارلیمنٹ کے اسپیکر اور دیگر اعلیٰ سول و عسکری قیادت سے اہم ملاقاتیں کیں۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر کے ہمراہ وفاقی وزیر داخلہ محسن نقوی بھی ایران گئے۔ ایرانی حکام نے ان کا استقبال کیا۔
دورے کے دوران فیلڈ مارشل عاصم منیر نے ایرانی صدر مسعود پزشکیان، سپریم نیشنل سکیورٹی کونسل میں رہبرِ اعلیٰ کے نمائندے محسن رضائی، ایرانی پارلیمنٹ کے اسپیکر محمد باقر قالیباف، وزیر خارجہ اور وزیر داخلہ سے ملاقاتیں کیں۔
آئی ایس پی آر کے مطابق ملاقاتوں میں خطے میں کشیدگی مزید بڑھنے سے روکنے، آبنائے ہرمز کو دوبارہ کھولنے اور جاری تنازع کے جلد خاتمے کے لیے مختلف اقدامات پر جامع تبادلہ خیال کیا گیا۔
فریقین نے علاقائی امن و استحکام اور تنازعات کو مذاکرات کے ذریعے حل کرنے کے طریقہ کار پر بھی گفتگو کی۔
ایرانی قیادت نے کشیدگی میں کمی، مذاکرات اور تنازع کے پرامن حل کے لیے پاکستان کے تعمیری کردار اور مخلصانہ سفارتی کوششوں کو سراہا۔
