کوئٹہ: بلوچستان کے ضلع بارکھان میں آپریشن ردالفتنہ 3 کے تحت کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے 10 دہشت گردوں کو ہلاک کردیا، جبکہ فائرنگ کے تبادلے میں سی ٹی ڈی کے 2 اہلکار زخمی ہوگئے۔
سی ٹی ڈی حکام کے مطابق بارکھان کے علاقے راڑہ شم میں فتنہ الہندوستان سے تعلق رکھنے والے دہشت گردوں کی موجودگی کی مصدقہ خفیہ اطلاع پر انٹیلی جنس بیسڈ آپریشن کیا گیا۔
کارروائی کے دوران 10 دہشت گرد ہلاک ہوئے، جبکہ ان کے قبضے سے بھاری مقدار میں اسلحہ اور گولہ بارود بھی برآمد کیا گیا۔
حکام کا کہنا ہے کہ بلوچستان میں دہشت گرد عناصر کے خلاف سیکیورٹی فورسز، پولیس اور سی ٹی ڈی کی مشترکہ کارروائیاں جاری ہیں، جن کا مقصد صوبے میں امن و امان کی صورتحال بہتر بنانا اور دہشت گردی کا خاتمہ ہے۔
