News Point – Latest Urdu News from Pakistan & World

چناب کالج شورکوٹ میں سالانہ فن فیئر کا شاندار انعقاد کیا گیا جس میں طالبات اور ان کی فیملیز کی بڑی تعداد نے شرکت کی۔

کالج انتظامیہ کی جانب سے طالبات اور فیملیز کے لیے خصوصی دن مقرر کیا گیا تھا تاکہ وہ پرسکون اور خوشگوار ماحول میں اس تفریحی و ثقافتی میلے سے لطف اندوز ہو سکیں۔

فن فیئر میں رنگا رنگ اور دلچسپ پروگراموں کا اہتمام کیا گیا جن میں میجک شو، کوئز پروگرام اور میوزیکل پروگرام نمایاں رہے، میجک شو نے طالبات کو حیرت میں مبتلا کیے رکھا جبکہ کوئز پروگرام کے ذریعے طالبات کی علمی صلاحیتوں کو اجاگر کرنے کا موقع فراہم کیا گیا۔

فن فیئر میں کھانوں کے منفرد اور دلکش سٹالز بھی لگائے گئے تھے جہاں مختلف روایتی اور فاسٹ فوڈ آئٹمز دستیاب تھیں، طالبات کے لیے مختلف جھولوں اور تفریحی سرگرمیوں کا بھی خصوصی انتظام کیا گیا جس سے فن فیئر کی رونق دوبالا ہوگئی، فیملیز اور طالبات فن فیئر کو خوب انجوائے کرتی نظر آئیں اور انہوں نے اس اقدام کو سراہا۔

کالج انتظامیہ کی جانب سے سیکورٹی کے سخت ترین انتظامات کیے گئے تھے تاکہ کسی بھی ناخوشگوار واقعے سے بچا جا سکے، والدین نے محفوظ اور منظم ماحول فراہم کرنے پر کالج انتظامیہ کی کاوشوں کو سراہا۔

تقریب کے اختتام پر انتظامیہ نے اس عزم کا اظہار کیا کہ آئندہ بھی ایسی مثبت اور صحت مند سرگرمیوں کا انعقاد جاری رکھا جائے گا تاکہ طالبات کی ہمہ جہت صلاحیتوں کو پروان چڑھانے کے ساتھ ساتھ انہیں تفریح کے مواقع بھی فراہم کیے جا سکیں۔