News Point PK

حیدرآباد: پاکستان سنی تحریک کے رہنماؤں نے حیدرآباد پریس کلب میں پریس کانفرنس کرتے ہوئے تنظیم کے مرکزی سینئر نائب صدر محمد خالد قادری پر ہونے والے مبینہ قاتلانہ حملے کی شدید مذمت کی ہے۔

رہنماؤں کا کہنا تھا کہ واقعے کے شواہد اور سی سی ٹی وی فوٹیجز موجود ہونے کے باوجود تاحال ملوث عناصر کو گرفتار نہیں کیا جا سکا، جو قانون نافذ کرنے والے اداروں کی کارکردگی پر سوالیہ نشان ہے۔

پریس کانفرنس کے دوران رہنماؤں نے مطالبہ کیا کہ حملے کی شفاف اور غیر جانبدار تحقیقات کے لیے آئی ایس آئی، ایم آئی اور آئی بی پر مشتمل مشترکہ تحقیقاتی ٹیم (جے آئی ٹی) تشکیل دی جائے تاکہ واقعے کے اصل محرکات اور ذمہ داران کو بے نقاب کیا جا سکے اور انصاف کے تقاضے پورے ہوں۔

انہوں نے حکومت سندھ، آئی جی سندھ، ڈی آئی جی اور ایس ایس پی حیدرآباد سے مطالبہ کیا کہ محمد خالد قادری اور ان کے اہل خانہ کو مکمل سیکیورٹی فراہم کی جائے، حملے میں ملوث ملزمان کو فوری طور پر گرفتار کرکے قانون کے کٹہرے میں لایا جائے اور انصاف کی فراہمی میں کسی قسم کی تاخیر نہ کی جائے۔

رہنماؤں نے کہا کہ اگر واقعے میں ملوث عناصر کے خلاف فوری اور مؤثر کارروائی نہ کی گئی تو پاکستان سنی تحریک آئندہ کے لائحہ عمل کا اعلان کرے گی۔