News Point – Latest Urdu News from Pakistan & World

وزیراعلیٰ سندھ سید مراد علی شاہ نے صدر میں واقع موبائل مارکیٹ کی عمارت کے اوپری منزل پر آگ لگنے کا نوٹس لیتے ہوئے کمشنر کراچی سے رپورٹ طلب کرلی جبکہ انھوں نے ہدایت دی کہ متاثرہ عمارتوں میں فوری ریسکیو اور امدادی کارروائی کی جائے اور آتشزدگی کے اسباب اور ذمہ داران کا تعین کیا جائے گا ، شہریوں کے جان و مال کا تحفظ حکومت کی اولین ترجیح ہے۔

واضح رہے کہ صدر میں واقع النجیبی موبائل مارکیٹ کی عمارت کے ساتویں فلور پر پارکنگ ایریا میں کھڑی گاڑیوں میں آگ بھڑک اٹھی تھی جس کے نتیجے میں 3 گاڑیاں جل کر خاکستر ہوگئیں ، اطلاع ملتے ہی فائر بریگیڈ کا عملہ موقع پر پہنچ گیا تھا،خوش قسمتی سے کوئی جانی نقصان نہیں ہوا۔

وزیراعلیٰ سندھ مرادعلی شاہ کی النجیبی بلڈنگ میں آتشزدگی پر قابو پانے پر ریسکیو ورکرز کو شاباش دی ہے۔

انھوں نے کہا کہ حادثات و واقعات میں جان و املاک کے تحفظ کو یقینی بنانے کیلئے جاں فشانی سے کام کریں ایسے واقعات و حادثات کی اطلاعات پر کراؤڈ مینجمنٹ کو مزید بہتر کیا جائے اور آئندہ ممکنہ حادثات کے پیش نظر اطراف کی سڑکوں پر ٹریفک کی روانی کو یقینی بنایا جائے۔