News Point PK

چیئرمین پی ٹی آئی بیرسٹر گوہر علی خان نے کہا ہے کہ حکومت کے ساتھ بات چیت نہیں ہورہی اور فی الحال مذاکرات صرف نام اور پیشکش کی حد تک ہیں، سہیل آفریدی کی تبدیلی کے حوالے سے خبریں بے بنیاد ہیں، کشمیر سے متعلق پی ٹی آئی دو دن میں بڑا فیصلہ کرے گی۔

میڈیا رپورٹ کے مطابق پشاور ہائی کورٹ میں صحافیوں سے گفتگو کرتے ہوئے بیرسٹر گوہر نے کہا کہ مذاکراتی عمل اب اِن لوگوں کی ذمہ داری ہے جن کے ہاتھوں میں اختیار ہے کیونکہ محمود اچکزئی صاحب نے بڑے پن کا مظاہرہ کرتے ہوئے وزیراعظم سے ہاتھ ملایا، اگر کوئی اسے ہماری کمزوری سمجھ رہا ہے تو یہ ان کی بھول ہے۔

وزیراعلی سہیل آفریدی کی تبدیلی کے حوالے سے انہوں نے کہا کہ یہ خبریں بے بنیاد ہیں اس وقت اسمبلی میں ان کی جگہ لینے والا کوئی امیدوار نہیں، نہ ہی علی امین گنڈا پور ان کی جگہ لے رہے ہیں، ناراض اراکین ملاقات ہوگی، انہیں سنا جائے گا، پی ٹی آئی میں کوئی فارورڈ بلاک نہیں۔

انہوں نے کہا کہ پی ٹی آئی کشمیر الیکشن کے حوالے سے فیصلہ آئندہ دو دنوں میں کرے گی ابھی تک پارٹی نے آزاد کشمیر انتخابات کے بائیکاٹ کا کوئی فیصلہ نہیں کیا اور سوشل میڈیا پر گردش کرنے والا نوٹی فکیشن مکمل طور پر جعلی ہے۔