News Point PK

وفاقی وزیر پیٹرولیم علی پرویز ملک نے کہا ہے کہ حکومت پیٹرولیم مصنوعات کی قیمتوں کے معاملے میں نہ کسی شعبے کو ترجیح دے رہی ہے اور نہ ہی کسی پر غیر ضروری بوجھ ڈال رہی ہے، جبکہ عالمی حالات اور بین الاقوامی ذمہ داریوں کو مدنظر رکھتے ہوئے صارفین تک ممکنہ فائدہ پہنچانے کے لیے اقدامات کیے جا رہے ہیں۔

میڈیا رپورٹ کے مطابق وفاقی وزیر پیٹرولیم علی پرویز ملک نے سماجی رابطے کی ویب سائٹ ایکس پر اپنے بیان میں کہا کہ حکومت پیٹرولیم مصنوعات کے حوالے سے متوازن پالیسی پر عمل پیرا ہے اور تمام فیصلے ملکی مفاد اور صارفین کے ریلیف کو سامنے رکھتے ہوئے کیے جا رہے ہیں۔

انہوں نے کہا کہ حکومت اپنی بین الاقوامی ذمہ داریوں کے دائرے میں رہتے ہوئے صارفین تک کسی بھی ممکنہ فائدے کی منتقلی کے لیے پُرعزم ہے۔

رپورٹ کے مطابق علی پرویز ملک نے کہا کہ وزیراعظم شہباز شریف نے اسی عزم کے تحت اب تک ہائی اسپیڈ ڈیزل کی قیمت میں مجموعی طور پر 200 روپے فی لیٹر کمی کی ہے، جبکہ پیٹرول کی قیمت میں مجموعی طور پر 155 روپے فی لیٹر کمی کی جا چکی ہے۔

وفاقی وزیر کے مطابق عالمی منڈی میں حالیہ ہفتے پیٹرول کی پلیٹس قیمت 98.35 ڈالر سے 91.68 ڈالر فی بیرل کے درمیان رہی، جبکہ ہائی اسپیڈ ڈیزل کی پلیٹس قیمت 109.09 ڈالر سے 104.79 ڈالر فی بیرل کے درمیان ریکارڈ کی گئی۔

انہوں نے کہا کہ پیٹرولیم مصنوعات کی قیمتوں کے تعین میں عالمی مارکیٹ کے رجحانات، ملکی ضروریات اور عوامی مفاد کو مدنظر رکھا جاتا ہے۔