News Point PK

ٹنڈوآدم کے جٹیا پاڑے کی رہائشی چار بچوں کی ماں مسمات روبینہ زوجہ شاہد شیخ نے پریس کلب پہنچ کر سسرال والوں کے خلاف مبینہ تشدد اور دھمکیوں کی شکایت کرتے ہوئے انصاف کا مطالبہ کیا۔

روبینہ نے میڈیا کو بتایا کہ سسرال والے معمولی باتوں پر اکثر اسے اور اس کے بچوں کو تشدد کا نشانہ بناتے ہیں۔ اس کا کہنا تھا کہ تین روز قبل بھی دیوروں، ساس اور نند نے مبینہ طور پر اسے اور اس کے بیٹے کو تشدد کا نشانہ بنایا، جس سے وہ زخمی ہوئے۔

متاثرہ خاتون کے مطابق اس نے شوہر کو شکایت کی مگر کوئی کارروائی نہ ہوئی، بعد ازاں تھانے پر بھی درخواست دی لیکن پولیس نے مبینہ طور پر اسے گھریلو معاملہ قرار دے کر واپس بھیج دیا۔

روبینہ نے الزام عائد کیا کہ سسرال والے مسلسل جان سے مارنے کی دھمکیاں دے رہے ہیں جبکہ شوہر بھی ان کا ساتھ دے رہا ہے۔ اس نے اعلیٰ حکام سے تحفظ فراہم کرنے اور انصاف کی اپیل کی ہے۔