سانگھڑ کے ڈسٹرکٹ ہیڈکوارٹر اسپتال میں 10 ماہ کے بچے کی ہلاکت پر لواحقین نے مبینہ طبی غفلت کے خلاف لاش پریس کلب کے سامنے رکھ کر احتجاج کیا اور ذمہ داروں کے خلاف کارروائی کا مطالبہ کیا۔
لواحقین کا الزام ہے کہ بچے کی حالت تشویشناک ہونے کے باوجود اسے بروقت اور مناسب طبی امداد فراہم نہیں کی گئی، جس کے باعث اس کی حالت مزید بگڑ گئی اور وہ دم توڑ گیا۔
واقعے کا نوٹس لیتے ہوئے ڈی ایچ او سانگھڑ ڈاکٹر فاروق آرائیں نے تین ڈاکٹروں پر مشتمل انکوائری کمیٹی قائم کردی، جسے علاج کا ریکارڈ اور متعلقہ عملے کے بیانات کا جائزہ لے کر 72 گھنٹوں میں رپورٹ پیش کرنے کی ہدایت کی گئی ہے۔
ڈی ایچ او کے مطابق غفلت ثابت ہونے کی صورت میں ذمہ دار ڈاکٹر یا عملے کے خلاف قانون اور محکمانہ ضابطے کے تحت کارروائی کی جائے گی۔
